Tejeduría tradicional en Galicia. El telar y la técnica

ÍNDICE

VISTA PREVIA

Coincidindo co décimo aniversario da súa publicación, e despois de varios anos esgotado, reimprimimos agora este libro-documento imprescindible que os nosos lectores viñan demandando dende hai tempo.

Entre os anos 1997 e 1998, un grupo de artesáns do téxtil decidiron investigar as técnicas tradicionais de tecido en tear de baixo lizo, que se desenvolveron en Galicia durante as xeracións anteriores e que, por entón, a finais do segundo milenio, xa comezaran a caer no esquecemento por falta de atención e estudo. Non só as recompilaron, senón que as analizaron e estudaron de tal forma que quedaron perfectamente documentadas para as xeracións futuras.

Este libro é o resultado daquelas viaxes e contactos coas últimas tecedoras galegas, herdeiras dunha longa tradición que sufriu, uns anos antes, a irremediable desaparición, ao perder a súa funcionalidade aquelas pezas que elaboraban artesanalmente durante moitas horas, despois aínda de ter que soportar a diario as duras tarefas domésticas e campesiñas.

Daquel traballo de campo realizouse unha edición urxente en 1998, pero non alcanzou a distribución necesaria a través dos medios habituais. Pasado o tempo, contactamos cos autores para ver a posibilidade de preparar unha edición máis completa e rigorosa que verdadeiramente fose accesible para as persoas interesadas no tema. As fotografías fixéronse todas de novo e incluíronse outras de interese histórico e etnográfico, realizadas entre 1919 e 1932 por fotógrafos de prestixio. Aumentáronse os textos e engadíronse novos apartados despois de reorganizar o esquema do libro, fixéronse máis debuxos para esta primeira edición e analizáronse novas pezas elaboradas nos teares galegos, á vez que se ampliou parte da investigación aos concellos de Taramundi e os Oscos, no occidente de Asturias, pola súa afinidade cultural e relación co oriente de Lugo.

Con esta publicación, en Editorial Canela continuamos a colección tradición oral e, dentro dela, a serie dedicada aos oficios artesáns, á vez que pretendemos chegar a un maior número de persoas que poidan estar interesadas na tecedura tradicional, poñendo ao seu alcance un libro áxil, rigoroso, ben documentado e útil para salvala do esquecemento. Por iso, cremos que a presente obra, publicada co maior respecto ao lector. os autores e ao artesán, será unha fonte de consulta valiosa para os investigadores que pretendan estudar e documentar aínda máis un oficio que se mantivo por tradición oral en Galicia ata case finais do século XX, momento no que foi deixando paso a novos métodos e técnicas dirixidas agora a outro tipo de demanda, e por tanto cun tipo de produción diferente para cubrir outras necesidades, xa que a súa utilización na sociedade tradicional existente ata entón mudou considerablemente por ese tempo.

ENVÍO GRATIS EN COMPRAS SUPERIORES A 50 €